Synossi

U 21 d’aostu di u 1975, cundutta da Edmond Simeoni, una dicina d’omi armati di fucili di caccia s’affaccanu in una cantina di vinu in Aleria, in Piaghja Urientale (Corsica).
Ghjè a cantina Depeille, chì hè suspettu d’esse imbulighjatu in un scandalu finanziariu.

A matina à bon’ora, l’impieghi sò cacciati fora senza viulenza è i militanti s’impadruniscenu di u locu.
Scrivanu missaghji nant’à i muri, alzanu bandere Corse, stanghitteghjanu e finestre è chjamanu i ghjurnalisti. Tutt’a ghjurnata, omi è donne, venuti di a Corsica sana, facenu cresce u numaru di cuntestatori.

Quand’ella vene a sera, hè tagliatu u telefonu. À u mumentu chì si stalla l’inchietudine, elicotteri, battelli di guerra, carri armati, 1.200 gendarmi è C.R.S. facenu a strada sin’à Aleria. S’appronta un drama…

A storia ingiru à u filmu

U nostru prughjettu hè di traspone à u screnu, in forma di filmu longu di fizzione, unu di l’avvenimenti maiò di a storia di a Corsica : l’avvenimentu d’Aleria di l’estate 1975.

Ci simu inspirati di a figuretta "Aleria 1975", scritta da Frédéric Bertocchini è disegnata da Michel Espinosa, chì restituisce di manera piuttostu fida ciò chì s’hè passatu durante sti dui ghjorni d’uccupazione di sta cantina.

L’autori si sò appughjatti nant’à testimunianze vere per dà una riconstituzione a più vicina pussibule di a rialità.

Hà permessu di spanticà fatti novi è scunnisciuti sin’à oghje. L’autori sò ghjunti à ramintà l’ambiente è e poste chì ci eranu à l’epica. U ritimu hè dinò assai interessante.
A figuretta hè dunque un bonu materiale di basa per scrive sta storia.

U filmu cercherà à apprufundisce ancu di più i persunaghji è e so emuzione, dà li in più polpa è prufundità.

A nostra vuluntà hè di mette l’incalcu nant’à a parte umana in una storia cusì. Per quessa, in più di un travaglione di ducumentazione, simu andati à scuntrà st’omi è ste donne ch’anu participatu da veru à sti dui ghjorni impurtanti.

Sò stati assai cuntenti di l’idea di traspone sta storia à u sinemà è d’accunsenti per parlà ci di stu sugettu di manera più persunale.

St’interviste ci anu datu l’estru per arrichisce è sviluppà u temperamentu di i persunaghji di u filmu, e so interazzione, i so sintimi.

Quandu si vede l’attualità è u cuntestu d’oghje (vittoria demucratica d’un partitu naziunalistu elettu à u capu di l’Assemblea di Corsica, vuluntà di i cumbattanti clandestini di sbarrazzà si pocu à pocu di e so arme), pensemu chì st’adattazione hè benvenuta per ramintà si di u principiu di stu muvimentu.

Cume a figuretta, stu filmu permetterà di fà scopre st’avvenimentu à e generazione da vene è dinò di spiegà à a ghjente chì cunnosce pocu (furesteri) e ragione di l’antagunisimu trà u Statu Francese è u populu Corsu.

Argumentu di u filmu

Di a listessa manera ch’in a figuretta, a narrazione di u filmu si cuncentrerà nant’à i militanti accampati.
Guasi tutt’a storia si passa nentr’à a cantina.

Stu sintimu d’inchjustramentu permette di stallà una tensione chì cresce pocu à pocu in u filmu.
U spettatore deverà avè l’impressione d’esse anch’ellu intrappulatu in a cantina cù i militanti, rinforzendu u sintimu d’immersione è d’affettu per i persunaghji.

Ma ùn si deve micca scurdà si di l’altru puntu di vista.

In un scopu d’obbiettività, a visione di e forze di l’ordine serà dinò mustrata.
Ci vole à capisce e ragione chì muttivanu ogni di e duie parte. L’una ùn hè micca più culpevule chè l’altra.
Pensemu piuttostu chì quelli chì portanu a respunsabilità di u scumpientu ch’ella hè divenuta st’affare, ùn eranu micca in piazza in Aleria ma in un altru locu (Place Beauvau).

L’idea di fà di st’avvenimentu un filmu hè guasi un’evidenza.

Certe scene incredibile ma vere facenu pensà à un filmu d’Hollywood (u cunfrontu trà e forze di l’ordine è u commando cù i "falzi" ostasgi, l’assaltu chì diventa sanguinosu, i militanti chì scappanu cunducendu un camiò è franchendu e trappule di i gendarmi, ecc.).

Un filmu ch’imbuleghja u "western" mediterraneu è u "thriller" politicu.

L'autori

Frédéric Bertocchini

Natu u 2 d’ottobre di u 1973 in Aiacciu
Dapoi 1992, Frédéric Bertocchini travaglia cume ghjurnalistu à a radio corsa Alta Frequenza.
Passiunatu di Storia, hè dinò scrittore di figurette è parechji di e so opere trattanu di a Storia di a Corsica : Paoli (3 libri), Sampiero Corso (2 libri), Aiò Zitelli ! Récits de guerre 14-18 (2 libri), Libera me (3 libri)…
Di manera più precisa, ghjè ellu l’autore di a seria di figurette in duie parte Aleria 1975.

Michè D’Onofrio

Natu u 21 du lugliu di u 1990 in Aiacciu.
Michè D’Onofrio, rializatore, hà fattu studii di sinemà in Corti, à l’IUT di Corsica, induve hà scrittu è rializattu i so primi filmi corti in u quadru di a so furmazione : Libertà per i scemi ! (fizzione) è Peppu Flori, l’Anima d’una cultura (ducumentariu).
L’annu dopu, hà rializattu un sicondu filmu cortu di fizzione, Tutt’in casa cumuna !, coproduttu da u Gruppu di Ricerche è di Prove Sinematografiche.
Co-scrittore d’ALERIA 1975.

Jean-François Perrone

Natu u 10 di maghju di u 1967 in Portivechju.
Cumediante prufessiunale dapoi lugliu 1994, mettitore in scena, Jean-François Perrone hà travagliatu à u teatru (Ben Hur, messu in scena da Robert Hossein, spettaculu à u Stadiu di Francia), à a televisione (Mafiosa, Engrenages, Les Héritières) è à u sinemà (L’Enquète Corse, Il était une fois dans l’Ouest de la Corse, Vive la France).
Co-scrittore d’ALERIA 1975.

Perchè u "crowdfunding" ?

A rializazione sinematografica hè cara è difficiule, sopratuttu quand’ellu ci vole à fà filmi di fizzione chì marcanu è chì sò rialisti nant’à i fatti ch’elli contanu. Ancu s’ellu ci hè parechji cullaburatori chì aiutanu o chì volenu aiutà, per avà ùn avemu micca i mezi per finanzià stu filmu. Eccu perchè vi lampemu una chjama.

Più chè simplici rigali, vulemu sparte cun voi a sperienza è l’ambiente ingir’à u filmu di parechje manere : invitu à participà à a filmera, maglie persunalizate, ecc.